राष्ट्र हितमा समर्पित

सरकारी गाडीमा सवार व्यक्तिले ड्युटीमा रहेका प्रहरीलाई लछारपछार

शनिवार, २७ माघ 8:49 PM

काठमाडौं । कालिमाटी चोकमा ड्युटी गरिरहेका एक ट्राफिक हवल्दारलाई सरकारी गाडीमा सवार दुई जनाले शनिवार अनाहकमा मुख छाड्न थाले ।

‘ड्युटी राम्रोसँग गर’ भन्दै अनाहक उफ्रिन थालेका ती दुईमध्ये एकजना ओर्लेर हवल्दारलाई लछार पछार पार्न थाले ।

यसरी ट्राफिक प्रहरीलाई लछार पछार पार्ने पोखराका शोभित पराजुली हुन् । अर्थमन्त्री ज्ञानेन्द्र बहादुर कार्कीका स्वकीय सचिव तथा सहोदार भाञ्जा भीष्म बस्नेतले भने गाडी चलाएका थिए ।

यसरी ड्युटीमा रहेका प्रहरीलाई लछार पछार गर्न थालेपछि दिपेन्द्र तिमल्सिनासहितका स्थानीयहरुले उनीहरु दुवैलाई कालिमाटी प्रहरीमा लगेर बुझाए ।

प्रहरीले अर्थमन्त्री भाञ्जा र उनका साथी सवार बा।१ झ ८२८२ नम्बरको सरकारी गाडी नियन्त्रणमा लिएको छ । कालिमाटी प्रहरी स्रोतका अनुसार शोभित र भिष्म दुवैले मदिरा सेवन गरेको पाइएको छ ।
बिदाको दिन सरकारी गाडी चलाउनका लागी आवश्यक पास समेत नलिइकन भिष्मले सरकारी गाडीको दुरुपयोग गरेको बताइएको छ ।

पोखराका शोभित पराजुली र अर्थमन्त्रालयको स्वामित्वमा रहेको टोयोटाको कोरोला एलएक्स कार नियन्त्रणमा लिइएको पुष्टि गर्दै महानगरीय प्रहरी वृत कालिमाटीका डिएसपी प्रदीप क्षेत्रीले भीष्म बस्नेतबारे अनभिज्ञता प्रकट गरेका छन् ।

‘ट्राफिक हवल्दारलाई मुख छाडेको चाहिँ पोखराका शोभित पराजुलीले हो’ उनले भने, ‘गाडी ट्राफिकले राखेको छ थप कुरा बुझ्दै छौं ।’