धवल शम्शेर राणा, मेयर, नेपालगन्ज उप-महानगरपालिका
करिब २० वर्षपछि सम्पन्न भएको स्थानीय तहको निर्वाचनबाट मेयर निर्वाचित हुँदै जिम्मेवारी सम्हाल्दा उप–महानगरपालिकाको अवस्था धेरै कमजोर र अस्तव्यस्त थियो। लामो समयसम्म स्थानीय तहको निर्वाचन नहुँदा कर्मचारीले नै जनप्रतिनिधिको भूमिका निर्वाह गरिरहेका थिए। जनप्रतिनिधिले गर्नुपर्ने काम कर्मचारीले गर्नसक्ने अवस्था पनि थिएन। जसका कारण उप–महानगरपालिकामा समस्या र चुनौती थुप्रिएर बसेका थिए।
मसहित निर्वाचित जनप्रतिनिधि, कर्मचारी, राजनीतिक दलहरु, विभिन्न संघसंस्थासँगको सहकार्यमा यो एक वर्षको अवधिमा हामीले धेरै उपलब्धिमूलक काम गरेका छौं। यसबाट म निकै उत्साहित छु।
मेयरको रुपमा यो मेरो दोस्रो कार्यकाल हो। स्थानीय तहका समस्या के हुन्, जनताले स्थानीय तहबाट के चाहेका छन्, हामीसँग उपलब्ध साधन, स्रोत र जनशक्ति कति र कस्तो छ भन्ने मलाई राम्रो ज्ञान छ। तत्काल गर्न सकिने अत्यावश्यक र जनताले राहत महसुस गर्ने काममा हामीले धेरै गरेका छौं।
यो कार्यकालको सबैभन्दा महत्वपूर्ण उपलब्धि भनेको उपमहानगरपालिकामा संस्थागत भ्रष्टाचार पूर्णरुपमा नियन्त्रण भएको छ। कुनै पनि योजना सम्पन्न भएपछिको भुक्तानी तथा सामग्रीको खरिदपछि बिल भुक्तानी गर्दा कमिसनवापत निश्चित रकम लिने र बाँडीचुँडी खाने प्रवृत्तिलाई कडाइका साथ रोकिएको छ।
नगरपालिकाको कामलाई थप प्रभावकारी बनाउन छुट्टै मोबाइल एप सञ्चालनमा ल्याउने अन्तिम तयारीमा छौं।
लामो समयदेखि अड्किएको ल्यान्डफिल साइटको समस्या हामीले सुल्झाएका छौं। जसबाट नगरको शहरी क्षेत्रको सरसफाइको अवस्थामा क्रमिक रुपमा सुधार भइरहेको छ।
उप–महानगरपालिकाको शहरी क्षेत्रमा करिब ७० किलोमिटर लामो सडक कालोपत्र गर्ने र नाली निर्माणको काम तीव्र गतिमा अगाडि बढेको छ। सडक विस्तारका लागि स्थानीय बासिन्दाले स्वतस्फूर्त रुपमा आफ्ना घरहरु भत्काइरहेका छन्। यसले डुबान, धूलो र हिलोबाट केही हदसम्म भए पनि नगरवासीले राहत पाएका छन्।
सडक र नाला निर्माण भएपछि हामीले सडक तथा नाला मर्मत सम्भार युनिट नै सञ्चालनमा ल्याउनेछौं। बाटोमा खाल्डो पर्नासाथ तुरुन्तै मर्मत गर्ने व्यवस्था मिलाउँदै छौं।
नेपालगन्ज निकै गर्मी हुने शहर हो। गर्मीबाट नगरवासीलाई राहत दिन नगरक्षेत्रमा हरियाली बढाउने हाम्रो योजना छ। नेपालगन्जको राझादेखि जमुनाहसम्मको सडकको करिब १२ किलोमिटर क्षेत्रमा यही वर्षाद्को बेला वृक्षरोपण गर्ने हाम्रो तयारी छ।
सरसफाइलाई व्यवस्थित गराउन थप २ वटा डोजर, एउटा एक्जाभेटर र २ वटा ट्याक्टर थपेका छौं। शहरलाई धूलोमुक्त बनाउन धूलो सफा गर्ने ब्रुमर मेसिन खरिद गर्ने तयारीमा छौं। नगर क्षेत्रमा तीन वटा पार्क निर्माण तथा जीर्णोद्धारको काम भइरहेका छन्। यसका साथै नगर क्षेत्रमा ६ सयभन्दा बढी साना–ठूला योजना सञ्चालन गरेका छौं।
नगरका २३ वटै वडामा वडा कार्यालय सञ्चालन गरेपछि जनताले आफ्नै क्षेत्रबाट सहज रुपमा सेवा पाउन थालेका छन्। यसअघि वडा कार्यालयहरु नगरपालिकाको कार्यालयमै थिए। कार्यालयको काम प्रभावकारी बनाउन सबै कार्यालयलाई इन्टरनेटसहितको कम्युटर सुविधा पुर्याएका छौं। प्रत्येक वडा कार्यालयका लागि सचिवसहित आवश्यक कर्मचारी र सफाइकर्मीहरुको व्यवस्था मिलाएका छौं।
कान्जी हाउस, बधशाला, गौशाला निर्माणको काम पनि भइरहेको छ। यस क्षेत्रकै प्रसिद्ध बागेश्वरी मन्दिर परिसरको जीर्णोद्धार र मर्मतको काम भइरहेको छ। नेपालगन्जमा ५० करोडभन्दा बढीको लागतमा भव्य सपिङ कम्प्लेक्स खोल्ने तयारी गरिरहेका छौं। त्यसको डिपिआर निर्माणको काम भइरहेको छ।
खेलकुदका गतिविधिलाई पनि तीव्रता दिएका छौं। मेयर कप कबड्डी, फुटबल, क्रिकेट, जुडो जस्ता प्रतियोगिता भइरहेका छन्।
यी लगायत अरु पनि काम गरिरहेका छौं। जनताका काम छिटो–छरितो ढंगबाट भइरहेकाले उनीहरुमा उपमहानगरले राम्रो काम गर्दै छ भन्ने विश्वास जागेको छ।
पहिलेको स्थानीय निकायभन्दा अहिलेको स्थानीय तहले धेरै अधिकार, साधन स्रोत र जनशक्ति पाएको छ। सिंहदरबारको अधिकार विस्तारै स्थानीय तहमा आइरहेको छ। ऐन नियमहरु बनिरहेका छन्। हामीले नगरपालिकालाई आवश्यक पर्ने ऐन–नियमहरु बनाइसकेका छौं। केही दिनभित्रै ती ऐन नियमलाई कानुनी प्रक्रिया पूरा गरेर लागू गर्छौं।
हामीले हाम्रो कार्यकालभित्रै नेपालगन्जलाई महानगरपालिका बनाउने र नेपालगन्ज विमानस्थललाई स्तरोन्नति गरी छिमेकी भारतीय शहर दिल्ली, लखनउसम्म उडान सञ्चालन गर्ने लक्ष्यका साथ पहल गरिरहेका छौं।
हामीले नगरपालिकाको आय स्रोत वृद्धिका लागि पनि विभिन्न काम गरेका छौं। गत वर्षको १० महिनाको तुलनामा यो वर्ष १० महिनामा नगरपालिकाको आम्दानी १ करोडभन्दा बढी वृद्धि गरेका छौं। नगरवासीले तिरेको करको सदुपयोग हुन्छ भन्ने विश्वास बढाउँदै करका दरहरुमा सुधार तथा परिमार्जन गरेर आम्दानी बढाउने योजनालाई अगाडि सारेका छौं।
आगामी ५ वर्षमा नेपालगन्ज चिल्ला कालोपत्रे सडक, सफा र हरियाली वातावरण, भ्रष्टाचारमुक्त, स्वास्थ्य र शिक्षाको उत्कृष्ट सुविधा भएको शहर बनाउने हाम्रो योजना छ।
