काठमाडौँ । इण्डियन राष्ट्रवादी कांग्रेस पार्टी (एनसीपी)का नेता बाबा सिद्दिकीको हत्याको जिम्मा लरेन्स विश्नोई समूहले लिएको छ ।
सामाजिक सञ्जालमार्फत बिश्नोई समूहले नेता सिद्दिकीको हत्याको जिम्मेवारी लिएको हो । यो समुहका मुख्य नाइके लरेन्स विश्नोई इण्डियाको तिहाड जेलमा छन् ।
उनको समुहले बाहिर बसेर यो हत्याकाण्ड गरेको इण्डियन सञ्चारमाध्यमले जनाएका छन् ।
उक्त समूहले बलिउड अभिनेता सलमान खानलाई सहयोग गर्ने व्यक्तिले आफ्नो हिसाब–किताब गरेर बस्न चेतावनीसमेत दिएको इण्डियन सञ्चार माध्यमहरूले जनाएका छन् ।
विश्नोई समूह बेलाबेला अभिनेता सलमान खानलाई मार्ने धम्की दिँदै आएको छ । स्थानीय सरकारले सलमानको सुरक्षा गतिबिधि बढाएको छ ।
मुम्बईको बान्द्रामा गएराति आक्रमणकारीले नेता सिद्दिकीमाथि दर्जनौँ गोली प्रहार गरेका थिए । इण्डियन सञ्चार माध्यमहरूका अनुसार हत्यामा संलग्न रहेको आरोपमा प्रहरीले दुई जनालाई पक्राउ गरेको छ ।
एक जना फरार रहेका छन् । पक्राउ परेका मध्ये एक उत्तर प्रदेश र अर्का आरोपी हरियाणाका भएको बताइएको छ । सिद्दिकीले महाराष्ट्र विधानसभामा बान्द्रापश्चिमबाट तीन पटक प्रतिनिधित्व गरेका थिए ।
झण्डै पाँच दशक कांग्रेसमा रहेर राजनीति गरेका सिद्दिकी यसै वर्ष कांग्रेस छाडेर राष्ट्रवादी कांग्रेस पार्टी (एनसीपी) प्रवेश गरेका थिए । गोली प्रहारबाट गम्भीर घाइते सिद्दिकीलाई लीलावती अस्पताल लगिएको थियो । तर, चिकित्सकले तत्कालै मृत घोषित गरेका थिए ।
को हुन् लरेन्स विश्नोई?
सन् १९९३ फेब्रुअरी १२ मा जन्मिएका लरेन्स विश्नोई स्नातक अध्ययन गरेका युवक हुन् ।
पञ्जाबको फिरोजपुरमा उनको घर छ । लरेन्सका बुवा उनी जन्मिुनभन्दा एक वर्षअघि हरियाणा पुलिसमा कन्स्टेबलका रूपमा भर्ना भएका थिए । तर, उनले ५ वर्षपछि जागिर छाडेर कृषि पेशा अँगाले । लरेन्सले पञ्जाब विश्वविद्यालयबाट एलएलबीको अध्ययन पूरा गरेका छन् ।
सन् २००९ मा अध्ययनका क्रममा उनी पञ्जाब युनिभर्सिटीको एक विद्यार्थी संगठनसँग जोडिए । सोही समयमा उनको भेट विद्यार्थी संगठनका अध्यक्ष गोल्डी बराडसँग हुन्छ ।
विद्यार्थी राजनीतिबाट अपराधतिर
गोल्डीसँगको भेट र विश्वविद्यालयको विद्यार्थी राजनीतिमा आएपछि लरेन्सका कदमहरू अपराधको दुनियाँतिर बढ्न पुगे । उनी अवैध गतिविधिहरूमा सहभागी हुन थाले ।
लरेन्स विश्नोई इण्डिया सरकारको नजरमा एक ‘आतंकवादी’ हुन् । उनीविरुद्ध राष्ट्रिय जाँच एजेन्सी र दिल्ली पुलिसले गैरकानूनी गतिविधि रोकथाम अधिनियम अन्तगर्त मुद्दा दायर गरेको छ ।
विश्नोई समूहले पञ्जाबी गायक सिद्धु मुसेवालाको हत्या गरेको दाबी गरेको थियो । लरेन्स अहिले दिल्लीको तिहाड जेलमा कैद छन् । उनीविरुद्ध दुई दर्जन आपराधिक मुद्दा दर्ता छन् ।
कस्तो छ विश्नोई समूह ?
विश्नोई समूहमा पेशेवर निशानेबाजहरू समावेश छन् । उनीहरू पञ्जाब, हरियाणा, राजस्थान, दिल्ली र हिमाचल प्रदेशबाट समूहका लागि काम गर्दछन् । उनीहरूको सञ्जाल विश्वभर फैलिएको दाबी इण्डियन सञ्चार माध्यमहरूको छ ।
लरेन्सका साथी सन्दीप भनिने काला जठेडीलाई दिल्ली पुलिस स्पेसल सेलले महाराष्ट्र संगठित अपराध नियन्त्रण अधिनियम (मकोका) मामिलामा ५ लाख रुपैयाँ पुरस्कार घोषणा गरेर पक्राउ गरेको थियो ।
सन्दीप यतिबेला जेलमा बन्दी जीवन बिताइरहेका छन् । विश्नोई समूहमा ७ सयभन्दा बढी ‘शुटर्स’हरू रहेका अनुमान छ । यो समुहको संजाल क्यानाडासम्म फैलिएको छ ।
(स्रोतः इण्डियन संचारमाध्यम)
