काठमाडौँ । काठमाडौँ स्थित दशरथ रंगशालामा बुधबार साँझ भएको साफ महिला च्याम्पियन फुटबल फाइनल खेलमा बंगलादेशले नेपाललाई पराजीत गरेको छ ।
साविक विजेता बंगलादेशले घरेलु टोली नेपाललाई हराउँदै लगातार दोस्रो पटक साफ महिला च्याम्पियनसिपको उपाधि जितेको हो । दशरथ रंगशालामा सम्पन्न फाइनलमा नेपाललाई २–१ ले हराउँदै बंगलादेशले उपाधि बोकेर घर फर्केको छ ।
बंगलादेशका लागि मोनिका चक्मा र ऋतु पोर्ना चक्माले १–१ गोल गरे । नेपालको लागि अमिशा कार्कीले बराबरी गोल फर्काएपनि नेपाल खेलमा फर्कन सकेन । बंगलादेशले लगातार दोस्रो पटक उपाधि जित्दा नेपाल भने छैटौं पटक फाइनलमा पराजित हुन पुग्यो ।
पहिलो हाफमा निकै प्रतिस्पर्धात्मक रहेको खेलमा दुवै टोलीले गोल गर्न सकेका थिएनन् । सुरुवाती १० मिनेटमा दुवै टोलीको प्रहार क्रसबारमा पनि लागेको थियो ।
दोस्रो हाफको सुरुवातमै बंगलादेशले अग्रता लियो । तर नेपालले ५ मिनेट पछि नै खेल बराबरीमा ल्यायो । खेलको अन्त्यतिर बंगलादेशले गोल गर्दै पुनः अग्रता लियो ।
त्यसपछि भने नेपाललाई आक्रमण बुन्न बन्चित गर्दै बंगलादेशले लगातार दोस्रो पटक उपाधि जित्यो ।
खेलको पहिलो मिनेटमा नै नेपाल ठूलो संकटबाट बच्यो । गीता राना गोलकिक प्रहार गर्ने क्रममा चिप्लिन पुग्दा उनको प्रहार सिधै तोहुरा खातुनको खुट्टामा पुग्यो ।
तोहुराको प्रहार क्रसबारको भित्री भागमा लाग्दै फर्कियो । त्यसको रिबाउन्डमा तोहुराकै हेडरलाई गोलरक्षक एन्जिलाले समातिन् ।
दशौं मिनेटमा नेपालको अग्रता लिने प्रयासमा क्रसबार नै बाधक बन्यो । अमिशा कार्कीले पेनाल्टी क्षेत्र बाहिरबाट गरेको प्रहार बारमा लागेको थियो ।
गोलरक्षक रुपना चक्माले रोक्न नसकेको बललाई साम्बाले पेनाल्टी क्षेत्र बाहिर लागेर अमिशालाई दिएपछि उनले दुई टच लिँदै प्रहार गरेकी थिइन् ।
खेलको २४ औं मिनेटमा गोलरक्षक रुपनाको अर्को गल्तीमा नेपाल फाइदा उठाउन असमर्थ रह्यो । विमला विकको क्रस रुपनाले ६ यार्ड बक्सनजिक फुस्काएपनि उक्त बलमा साम्बा पुग्न नपाउँदै डिफेन्डर अफिदाले क्लियर गरिदिइन् ।
दोस्रो हाफको ५० औं मिनेटमा नै बंगलादेशले अग्रता लियो । पेनाल्टी क्षेत्रभित्र नेपालको डिफेन्सले क्लियर गर्न नसकेको बललाई मोनिका चक्माले दोस्रो टच लिँदै गोलरक्षक एन्जिला तुम्बापो सुब्बालाई बिट गरिन् ।
५६ औं मिनेटमा नेपालले बराबरी गोल फर्कायो । प्रिती राईले मिडफिल्डबाट खेलेको पासमा बंगलादेशको डिफेन्स लाइनबाट गल्ती भएपछि अमिषा कार्कीले बललाई पेनाल्टी क्षेत्रभित्र लग्दै गोल गरिन् ।
६८ औं मिनेटमा कप्तान एन्जिलाको उत्कृष्ट बचाउमा खेल बराबरीमा रह्यो । मारिया मान्दाले पेनाल्टी क्षेत्र बाहिरबाट गरेको शक्तिशाली प्रहारलाई गोलरक्षक एन्जिलाले डाइभ दिएर बचाइन् ।
खेलको ८२ औं मिनेटमा बंगलादेशले पुनः अग्रता लियो । ऋतु पोर्ना चक्माले बायाँ विंगबाट दिएको क्रसलाई गोलरक्षक एन्जिलाले बचाउन नसक्दा सिधै गोल भयो । एन्जिलाले एक हातले बचाउन खोजेपनि बल उनको हातमा लाग्दै गोल भएको थियो ।
त्यसपछि बंगलादेशले बल पोसेसनमा पकड जमाउँदै नेपाललाई आक्रमण बुन्ने अवसर दिएन ।
नेपाल सात पटक साफ च्याम्पियनसिप खेल्दा छैटौं पटक फाइनलमा पराजित हुन पुग्यो ।
खेल हेर्न प्रधानमन्त्री तथा एमाले अध्यक्ष केपी शर्मा ओली, उपप्रधानमन्त्री प्रकाशमान श्रेष्ठ सिंह, खेलकुद मन्त्री बद्रि पाण्डे लगायत रंगशाला पुगेका थिए ।
दर्शकहरुको अत्यधिक चापका कारण सबैले खेल हेर्न टिकट पाएका थिएनन् । हजारौं खेलप्रेमी काठमाडौँ महानगरपालिकाले सुविधा दिएका विभिन्न स्थानका स्कृनबाट खेल हेरेका थिए ।
कान्तिपुर म्याक्स टिभीमा मात्रै १० लाख बढीले प्रत्यक्ष प्रशारण हेरेका थिए ।
यो खेललाई बंगलादेशका मुलधारका मिडियाले प्रमुख प्राथमिकता साथ प्रकाशन प्रशारण गरेका छन् ।
