काठमाडौँ । राष्ट्रिय प्रजातन्त्र पार्टी (राप्रपा) ले आजदेखि देशभरका मुख्य शहरहरुमा सभा गर्दैछ ।
राप्रपाले यी सभाहरुमा व्यवस्थाकै विरोध गर्ने भएको छ । गणतन्त्र व्यवस्था विरुद्धको भण्डाफोर अभियान चलाएर राप्रपाले देशभरका राजतन्त्रमा झुकाव राख्नेलाई गोलबद्ध गर्ने भएको छ ।
राप्रपा संसदको पाँचौ ठूलो दल हो ।
आज पोखराबाट
राप्रपाले व्यवस्था विरुद्धको भण्डाफोर अभियान सुरुवात आज शुक्रबारदेखि पोखराबाट गर्दैछ ।
पोखराको चिप्लेढुंगामा हुने सभामा राप्रपा अध्यक्ष राजेन्द्र लिङ्देन सहितका शिर्ष नेताहरुले सम्बोधन गर्नेछन् ।
यो अभियान वर्तमान व्यवस्था, कुशासन र भ्रष्टाचारको भण्डाफोर गर्नका लागि सुरु गरिएको अध्यक्ष लिङ्देनले जानकारी गराए ।
उनले पूर्व राजा ज्ञानेन्द्र शाहको प्रजातन्त्र दिवसमा दिएको अभिव्यक्तिलाई देशको आवाज भएको वताएका थिए ।
राप्रपाले गणतन्त्रतात्मक व्यवस्था खारेज गरी राजसंस्था र हिन्दु राष्ट्र पुनस्र्थापना गर्नुपर्ने मत राख्दै आएको छ ।
प्रजातन्त्र दिवसको अवसरमा पूर्वराजा ज्ञानेन्द्र शाहले दिएको अभिव्यक्तिबाट राप्रपा अहिले उत्साहित देखिन्छ ।
ज्ञानेन्द्र शाहले जनताको भलोका लागि आफूले राजगद्दी त्यागेको विषयलाई कमजोरी नठान्न चेतावनी दिएका थिए । उनले व्यवस्था बदल्नेबाट नागरिकको अवस्था परिवर्तन हुन नसकेको भन्दै अहिलेका राजनीतिक दलहरुप्रति रोष पोखेका थिए ।
पूर्व राजाको सम्बोधनपछि राप्रपा प्रमुख शहरहरुमा भण्डाफोर अभियान सुरु गरेको छ ।
राप्रपाले पोखरामा आज फागुन ९ गते, बुटवलमा फागुन १७ गते, धनगढीमा फागुन १८ गते, जनकपुरमा फागुन २१ गते, काठमाडौंमा फागुन २५ गते र सुर्खेतमा फागुन २७ गते सभा गर्नेछ ।
राप्रपाको यो सक्रियता कतिको फलदायी हुनेछ त्यो त आउने निर्वाचनको परिणामले देखाउनेछ ।
कट्टर राजतन्त्र पक्षधरहरु भने निर्वाचन मार्फत नभई ज्ञानेन्द्र शाहलाई सोझै राजगद्दीमा बसाएर राजा घोषणा गर्नुपर्ने पक्षमा छन् ।
