काठमाडौँ । राजनैतिक परिपक्वता नभएको आरोप खेपिरहेको राष्ट्रिय स्वतन्त्र पार्टी (रास्वपा) अब भने मुलुकको जिम्मेवारी राजनीति दल बन्ने अभ्यासमा लागेको छ ।
यसका लागि रास्वपाको केन्द्रीय प्रशिक्षण विभाग देशभरका सदस्यहरुलाई कक्षा (शिक्षण) संचालन अभियानको दिशामा छ । केन्द्रीय समितिका सदस्यहरूलाई राजनैतिक प्रशिक्षण सञ्चालन गरेर रास्वपा परिपक्व राजनीति अभ्यासमा अग्रसर भएको हो ।
शुक्रबारदेखि सञ्चालन भएको राजनैतिक प्रशिक्षणको पाठ्यक्रम केन्द्रीय समितिबाट स्वीकृत गरिएको थियो । नयाँ बन्दै गरेको संगठनलाई प्रशिक्षण गर्दै जाने योजना स्वरूप रास्वपाले केन्द्र देखि प्रशिक्षण आरम्भ गरेको हो।
यस अघि उपलब्ध विज्ञको आधारमा रास्वपाले प्रशिक्षण गर्दै आएको थियो ।
रास्वपाको स्वीकृत पाठ्यक्रमको पहिलो प्रशिक्षण केन्द्रीय कार्यालय वनस्थली काठमाडौँमा आयोजना गरिएको छ । पार्टी कार्यवाहक सभापति डोल प्रसाद अर्याल (डीपी) ले प्रशिक्षणको औचित्य र महत्त्व बारे प्रकाश पार्दै प्रशिक्षण सुरु भएको थियो ।
अर्यालले अबको नेपालको राजनीति नेतृत्व रास्वपाले गर्ने निर्विकल्प आधारहरु प्रस्तुत गरेका थिए ।
प्रशिक्षणमा कार्यवाहक सभापति अर्याल सहित उपसभापति स्वर्णिम वाग्ले, कार्यवाहक महामन्त्री, सहमहामन्त्रीहरू, कोषाध्यक्ष, सहकोषाध्यक्ष, केन्द्रीय सदस्यहरू, सांसदहरूको उपस्थिति रहेको थियो ।
रास्वपाले यो प्रशिक्षणमा मूलतः ६ वटा मुख्य विषयहरू प्रशिक्षणमा समेटेको छ । जसमा राजनीतिक प्रशिक्षण, शासन प्रणाली, समाज, सामाजिक न्याय र कानुन, अर्थराजनीति र भूराजनीति, सांगठनिक, जिम्मेवारी र लक्ष्य र प्रशासनिक व्यवस्था रहेका छन् ।
प्रशिक्षणका ६ मुख्य शीर्षकहरूलाई १५ भागमा विभाजन गरी कुल ५६ वटा विषयहरूमा दुई दिने प्रशिक्षण सञ्चालन भएको छ । प्रशिक्षणमा कक्षागत प्रशिक्षण, व्यवहारिक अभ्यास र दस्ताबेज अध्ययनलाई विधिको रूपमा लिइएको छ ।
जसमा व्याख्यान, प्रस्तुति, र समूह छलफल, घटना अध्ययन, भूमिकानाटक, र सामूहिक कक्षा, सम्बन्धित पुस्तक, संविधान, र पार्टी दस्ताबेजहरू अध्ययन जस्ता विधिहरू समावेश गरिएको छ ।
रास्वपाले केन्द्रीय प्रशिक्षणमा प्रयोग गरेको सामाग्रीका आधारमा प्रदेश, जिल्ला र स्थानीय पालिका संगठनलाई समेत प्रशिक्षण दिने तयारी गरेको छ ।
पार्टीले प्रशिक्षणको मूल्याङ्कन विधि समेत बनाई मूल्याङ्कन गर्ने गरेको जानकारी गराइन्छ । रास्वपाले केही समयअघि संगठन निर्माणको प्रथम चरण पुरा गरेको छ ।
धेरै नागरिक रास्वपामा आउन चाहेकोले सबैलाई सही जिम्मेवारी दिनका लागि मातहतका संगठनमा आवद्ध हुन रास्वपाले साधारण सदस्यता खुल्ला राखेको छ ।
