काठमाडौँ । राष्ट्रिय स्वतन्त्र पार्टी (रास्वपा) का सभापति रवि लामिछानेले क्रान्तिका लागि तयार हुन आह्वान गरेका छन् ।
मुलुकमा गंभिर अवस्था आएको संकेत गर्दै रविले भने,‘गेट रेडी फर रिभोलुसन ।’
शुक्रबार उच्च अदालत पाटनमा जिल्ला अदालत काठमाडौंले ६० लाख रुपैयाँ धरौटी मागको आदेश बदर गर्न निवेदन दर्ता गराएपछि सञ्चारकर्मीहरूसँग कुराकानी गर्दै रविले भनेका छन्,‘सरकारको लाज छोप्नका लागि आँफू अदालत धाइरहेको छु ।’
‘सरकार अहिले नांगिएको हुनाले लाज छोप्नका लागि म अदालत घुमिरहेको छु । सरकारको लाज छोप्दिनुपर्नेछ । म ठाउँठाउँमा पुग्नुपर्नेछ । समय आउँदैछ । सबैलाई तयार हुनका लागि भन्न चाहन्छु । गेट रेडी फर द रिभोलुसन,’ रविले क्रान्तितिर फोकस हुँदै भने।
पूर्वगृहमन्त्री समेत रहेका रविले दुई तिहाइको सरकारले समस्याको समाधान गर्ने बाचा गरे पनि कुनै विषम परिस्थिति बिना नै मिलेको हुँदा यसले भयावहको स्थिति निर्माण गर्नेबारे पनि संसदमा बोलेको बताए ।
‘दुई तिहाइको सरकार छ। दुई तिहाइको सरकारले देशको तमाम समस्या समाधान गर्नुपर्ने थियो। के बाचा गरेको थियो,’ रविले भने, ‘एउटै कुरा स्मरण गराउन चाहन्छु। मैले संसदमा जब दुई ठूला राजनीतिक दलहरू बिना कुनै विषम परिस्थितिमा मिल्छन् भने त्यसबाट उत्पन्न हुने परिस्थिति भयावह हुन्छ तपाईंहरूलाई अन्दाज छ भनेर भनेको थिएँ । त्यही स्मरण गराउन चाहन्छु।’
रविले आफू बोले दुई तिहाइको सरकारलाई अप्ठ्यारो पर्ने पनि बताए।
रविले राजवादीको आन्दोलनबारे गरिएको प्रश्नमा कुनै ठोस उत्तर नदिई आफ्नै ढंगले जवाफ दिंदै भने,‘आँफू कुनै आवेग र उत्तेजनामा आएर अभिव्यक्ति नदिने पक्षमा छु ।’
उनले भने, ‘मैले बोल्ने समय नजिक आउँदैछ । अहिले नै म बोलेँ भने दुई तिहाइको सरकारलाई गाह्रो पर्ला, त्यसैले मलाई बोल्न नलगाउनुस । जब म बोल्ने समय आउँछ, त्यसपछि धेरैको बोली बन्द हुन्छ ।’
रविले सोधिएका केही प्रश्नहरुको उत्तर दिंदै भने,‘यो देशको भविष्य तपाईं हाम्रो पुस्ताको हातमा आउँदैछ । एकदमै गम्भीर हुने समय हो । म तपाईँलाई हेडलाइन दिन्न, म लाइफलाइनको कुरा गर्दैछु, तपाईं हेडलाइनको चिन्ता गर्दै हुनुहुन्छ । यो हेडलाइनमा चिन्ता गर्ने बेला होइन । यो पक्ष–विपक्षमा बाँड्ने कुरा होइन । अहिले सरकार नांगिएको हुँदा सरकारको लाज छोप्न अदालतहरुमा पुगिरहेको छु । ठाउँ ठाउँमा पुग्नुपर्ने छ । समय आउँदैछ चाँडै नै । सबैलाई तयार रहन आग्रह गर्दैछु ।’
भीडमा सहभागीहरुको जिज्ञासा थियो,‘गणतन्त्र विरुद्ध भइरहेको आन्दोलनप्रति रविको धारणा के हो ?’
तर, रविले घुमाउरो पारामा अन्य विषयमा बोलेपनि राजतन्त्र पक्षधरको आन्दोलनका बारेमा संयम देखाएका थिए ।
सरकार र विपक्षीमा भएका दलहरुले व्यवस्थाका विषयमा आआफ्ना धारणा सार्वजनिक गरेपनि रास्वपा भने अहिलेसम्म मौन बस्दै आएको छ ।
