काठमाडौँ । सरकारले राप्रपा नेताद्वय रविन्द्र मिश्र र धवलशमशेर राणाको थुना अवधि लम्ब्याउने तयारी थालेको छ ।
राजधानीको तीनकुने क्षेत्रमा अस्ति शुक्रबार भएको प्रदर्शनका क्रममा हिंसा भड्काएको आरोपमा पक्राउ परेका मिश्र र राणालाई राज्य विरुद्धको अपराध कसुरमा मुद्दा चल्ने भएको हो ।
यही मुद्दाको तयारी र उनीहरु विरुद्ध म्याद थप्न आदेशका लागि आज आइतबार प्रहरी जिल्ला अदालत जाने भएको छ ।
विवादास्पद छविका धर्मगुरु भनिने पुष्कर खतिवडा, पशुपति खड्का लगायतलाई पनि यो मुद्दा लाग्ने भएको छ ।
सबैलाई म्याद थपका लागि आजै जिल्ला अदालत लगिने तयारी प्रहरीले गरेको छ ।
तर, अधिवक्ता स्वागत नेपालको हकमा भने म्याद थप गरेर थुनामै पठाउने वा नपठाउने भन्ने बारेमा अन्योल देखिन्छ । प्रहरीका अनुसार, अधिवक्ता नेपाल प्रत्यक्ष प्रदर्शनमा सहभागी नभएकोले उनको बारेमा के हुन्छ यसै भन्न नसकिने अवस्था छ ।
शुक्रबारको घटनामा प्रहरीले हालसम्म ११३ जनालाई पक्राउ गरेको छ । पक्राउ परेका हकमा आवश्यक स्क्रिनिङपछि आगजनी, संगठित अपराध, ज्यान सम्बन्धी कसुर, आगजनीलगायतका मुद्दा चलाउने प्रहरीको भनाइ छ ।
शुक्रबार पूर्वराजा पक्षधरको प्रदर्शनमा २ जनाको मृत्यु भएको थियो भने तोडफोड, लुटपाट र आगजनी घटना भएका थिए ।
