काठमाडौँ । राप्रपा नेताद्वय रविन्द्र मिश्र र धवलशमशेर राणालाई जिल्ला अदालत काठमाडौंले पाँचदिन थुनामा राख्न अनुमति दिएको छ ।
तीनकुनेको हिंसात्मक घटनामा संलग्न भएका कारण मिश्र र राणा सहित ४२ जनालाई थुनामा राखेर अनुसन्धान अघि बढाउन अनुमति दिएको हो ।
न्यायाधीश तारादेवी महर्जनको इजलासले तीनकुने हिंसात्मक घटनामा संलग्न भएका कारण पक्राउ परेकाहरुलाई थुनामा राखेर अनुसन्धान अघि बढाउन प्रहरीलाई अनुमति दिएको छ ।
शुक्रबार पक्राउ परेकाहरूको हकमा ५ दिन र शनिवार पक्राउ परेकाहरुलाई ४ दिन हिरासतमा राख्न अनुमति छ । अनुमतिको अवधि पक्राउ परेको दिनदेखि नै गणना हुनेछ ।
जिल्ला सरकारी वकीलको कार्यालयले १० दिन थुनमा राख्न अनुमति मागेकोमा राणा क्यान्सरको बिरामी भनी कागजात पेस भएको थियो भने मिश्रको हकमा प्रेसरको बिरामी भई इजलासमा फाइल पेस भएकाले अदालतले ५ दिनको अनुमति मात्रै भएको हो ।
जिल्ला प्रहरी परिसर, काठमाडौंले तीनकुने हिंसात्मक घटनामा संलग्न भएका कारण बेलुकी ५ बजेतिर जिल्ला अदालतमा पेस गरेको थियो । अदालतमा गोला छनौटका क्रममा आइतबार न्यायाधीश महर्जनलाई थुनाको अनुमतिसम्बन्धी निवेदन हेर्ने जिम्मेवारी तोकिएको थियो ।
सामान्यतयाः प्रहरीले थुनामा रहेका व्यक्तिलाई इजलासमा पेस गरेपछि फाइल हेरेर थुनाको अनुमति दिने अभ्यास छ । तर आइतबार राणा र मिश्रलाई अदालतमा पेस गरेपछि उनीहरूका कानुन व्यवसायीहरूले झुटो र राजनीतिक पूर्वाग्रहका आधारमा मुद्दा चलाउन खोजिएको भन्दै थुनामा राख्न अनुमति दिन नहुने जिकिर गरेका थिए ।
जिल्ला अदालतले मिश्र र राणा लगायत ११ जनालाई राज्यविरुद्धको कसुर गरेका कारण देखाएर थुनामा राख्ने अनुमति दिएको हो । त्यसक्रममा प्रहरीले उनीहरूमाथि संगठित अपराध गरेका आरोपमा समेत अनुसन्धान गर्ने भनी फाइल पेस गरेको छ ।
ती बाहेक थप ३१ जनालाई संगठीत रुपमा आपराधिक उपद्रव गरेको आरोपमा प्रहरीले अनुसन्धान अघि बढाएको छ । प्रहरीले उनीहरुलाई त्यसक्रममा संगठित अपराध गरेको आरोप समेत आकर्षित हुनेगरी अनुसन्धान भइरहेको भन्दै म्याद थप्न पेस गरेको थियो ।
जिल्ला सरकारी वकीलको कार्यालयका अनुसार, उनीहरूमाथि प्रारम्भिक अनुसन्धानपछि राज्यविरुद्धको कसुर आकर्षित हुने देखिएकाले म्याद थप गरिएको हो ।
साम्प्रदायिक दंगा र घृणा फैलाउने काम गरेको आरोप आकर्षित हुने भएकाले पाँच वर्षसम्म कैद र ५० हजार रुपैयाँसम्म जरिवाना हुनसक्नेछ ।
उनले सार्वजनिक रुपमा नै जाहेरी, प्रमाण र अरु विवरणहरू माग भइरहेको भन्दै ती व्यक्तिहरू अरु कसुरमा संलग्न भएको भेटिए अरु कसुरमा पनि म्याद थपेर मुद्दा चलाइनेछ ।
प्रहरीले करिब एक सय जनाको हाराहारीमा पक्राउ गरेपछि अहिलेका लागि ४२ जनालाई मात्रै अदालतमा पेस गरेर अनुसन्धानको प्रक्रिया अघि बढाएको छ ।
पक्राउ परेका अधिवक्ता स्वागत नेपाल प्रहरीले हाजिरी जमानीमा छाडेको छ । अधिवक्ता नेपाल प्रदर्शनमा सहभागी थिएनन् ।
शुक्रबारको हिंसात्मक प्रदर्शनमा सहभागी र उस्काउने कार्यमा संलग्न अझै प्रहरीको निगरानीमा छन् ।
प्रहरी प्रवक्ता दिनेशकुमार आचार्यले घटनालाई उत्तेजित बनाउने, प्रदर्शनमा संलग्न र योजना बनाउने सबैलाई कानुनी दायरामा ल्याउने जानकारी दिए ।
यही चैत १५ गते शुक्रबार पूर्वराजा पक्षधरले गरेको हिंसात्मक प्रदर्शनका क्रममा दुईजनाको मृत्यु, लुटपाट, आगजनी, तोडफोड र अर्बौंको सम्पत्ति नोक्सान भएको थियो ।
हिंसात्मक प्रदर्शनका मुख्य योजनाकार चरम विवादित व्यक्ति दुर्गा प्रसाईं भने फरार छन् । प्रसाईं फेला नपरेसम्म खोजी कार्य जारी रहने प्रहरीले जनाएको छ ।
