काठमाडौँ । राष्ट्रिय स्वतन्त्र पार्टी (रास्वपा)ले सभापति रवि लामिछानेलाई उनकै घरको बेडरुममा बसेर पक्राउ पुर्जी लेख्ने अभ्यास क्षम्य नहुने बताएको छ ।
केन्द्रीय सचिवालयको शुक्रबार राति साढे १ बजेसम्म बसेको भर्चुअल बैठकले सभापति लामिछानेको बेडरुममा बसेर प्रहरीले पक्राउ पुर्जी लेख्ने अनौठो अभ्यासप्रति भत्सर्ना गरेको छ ।
निर्णयमा रास्वपा सचिवालयले भनेको छ,‘उच्च अदालत तुलसीपुर बुटवल इजलासले सभापति लामिछानेप्रति गरेको आदेशलाई सम्मान गर्ने तर कानुनमा आधारित रही अर्को तह र ढोकामा न्यायको लागि अघि बढ्ने निर्णय गरेको छ ।
सहकारी मुद्दामा तुलसीपुर उच्च अदालतको आदेश अनुसार रास्वपा सभापति लामिछाने शुक्रबार राती ९ बजे निवासबाटै पक्राउ परेका थिए ।
लामिछाने पक्राउलाई लिएर पार्टी भित्र र बाहिर सरकारको चर्को आलोचना भइरहेको छ ।
रास्वपाका निर्णयहरु–
देहायका निर्णयहरू गरेको सम्बन्धित सबैको जानकारीका लागि प्रकाशित गरिएको छ।
१. उच्च अदालत तुलसीपुर बुटवल इजलासले पार्टी सभापति रवि लामिछानेज्यूको सम्बन्धमा जुन निर्णय गरेको छ, त्यो निर्णयलाई कानुनको एक तहको निर्णयको रूपमा बुझ्दै, पार्टी सभापति रवि लामिछानेज्यूले आफ्नो भिडियो सन्देशमा भन्नुभएझैं, अदालत र अदालतको निर्णयको सदैव सम्मान गर्ने। साथै, अदालत, संविधान र कानुनमा आधारित रही अर्को तह र ढोकामा न्यायको लागि अघि बढ्ने।
२. पक्राउ पुर्जी नलिएरै पक्राउ गर्न आउने कुरा मात्र होइन, सभापतिज्यूको घरमा — त्यो पनि बेडरुमभित्र बसेर — जुन किसिमले पूर्जी लेख्ने अनौठो अभ्यास प्रहरीले ग¥यो, विधिको शासनमा त्यो क्षम्य हुन सक्दैन। नागरिकको घरभित्र छिरेर कानुनी कागजात बनाउने गैर–संवेदनशील र गैरकानुनी कुराको भत्सर्ना गर्ने।
३. आज चैत्र २३ गते शनिबार २ बजे भरतपुर, चितवनमा आयोजना हुन लागेको जनयात्रा शुभारम्भ सभालाई भव्य रूपमा सफल पार्ने। राज्यले विवेक गुमाएको बेला हामीले विवेक गुमाउनु हुँदैन र हामीले गर्ने सभा शान्त र सौम्य हुनुपर्छ भन्ने सभापतिको निर्देशनबमोजिम सभालाई शान्तिपूर्ण बनाउन तथा हुन सक्ने सम्भावित घुसपैठ, चलखेल तथा बिथोल्ने प्रयासहरू रोक्नका लागि सबै सदस्यहरूलाई सचेत, संयमित र गम्भीर रहन निर्देशन दिने।
४. पार्टी सभापति रवि लामिछानेले पार्टीको नेतृत्व जिम्मेवारीको लागि कार्यवाहक सभापतिमा उपसभापति डिपी अर्यालज्यूलाई तोकेकोमा त्यसलाई अनुमोदन गर्ने।
